Gerð verkefnislýsinga
Gátlisti fyrir kennara
Góð verkefnislýsing hjálpar nemendum að skilja hvað þau eiga að gera, hvers vegna verkefnið skiptir máli, hvernig það verður metið og hvaða stuðningur eða aðstoð er leyfileg. Í námsumhverfi þar sem gervigreind er aðgengileg þarf verkefnislýsingin einnig að skýra hvernig nemendur eiga að sýna eigið nám, dómgreind og ábyrgð.
Verkefni eru ólík að eðli, umfangi og vægi. Veldu þau atriði listans sem eiga við.
1. Tilgangur og tenging við hæfniviðmið
Útskýrðu hvers vegna verkefnið skiptir máli.
Hugaðu að því að taka fram:
- hvað nemendur eiga að læra, þjálfa eða sýna,
- hvaða hæfniviðmið námskeiðsins verkefnið styður,
- og hvernig verkefnið tengist efni og viðfangsefnum námskeiðsins.
Gagnleg spurning:
Hvað eiga nemendur að geta sýnt með þessu verkefni sem kæmi ekki fram í almennu svari frá gervigreind?
2. Verkefnið sjálft: Hvað eiga nemendur að gera?
Útskýrðu á hnitmiðaðan og skýran hátt hvað nemendur eiga að gera.
Taktu fram, eftir því sem við á:
- meginverkefni eða spurningu,
- hverju nemendur eiga að skila,
- skref eða áfanga,
- hvort nemendur mega velja efni, tilvik, gögn, aðferð eða skilasnið,
- kröfur um efni, gögn, heimildir, aðferðir eða námsefni,
- og algeng mistök eða misskilning sem nemendur ættu að forðast.
Þar sem það á við er gott að hanna verkefni þannig að nemendur þurfi að beita hugtökum, aðferðum eða kenningum námskeiðsins á tiltekið samhengi, tilvik, vandamál, gagnasafn eða starfsvettvang.
3. Vinnuferli, áfangaskil og sýnilegt nám
Hugaðu að því hvernig nemendur geta sýnt hugsun sína og námsferli, ekki aðeins lokaafurðina.
Þetta má til dæmis gera með:
- verkáætlun eða rannsóknarspurningu,
- drögum eða áfangaskilum,
- heimildaskrá með skýringum eða rökstuðningi fyrir vali á heimildum,
- ígrundun um val, endurgjöf eða endurskoðun,
- stuttri munnlegri útskýringu eða vörn,
- og yfirlýsingu um hvernig úttak gervigreindar var notað, metið eða hafnað.
Gagnleg spurning:
Hvernig geta nemendur gert eigin skilning, dómgreind og ákvarðanatöku sýnilega?
4. Námsmat, matsviðmið og vægi
Nemendur þurfa að vita hvernig verkefnið verður metið.
Taktu fram:
- matsviðmið eða matskvarða,
- hvað telst framúrskarandi, fullnægjandi eða ófullnægjandi frammistaða,
- vægi verkefnisins í lokaeinkunn,
- hvort metin er lokaafurð, vinnuferli, ígrundun, samvinna, munnleg útskýring, einstaklingsframlag eða samspil þessara þátta,
- lágmarkskröfur til að standast verkefnið, ef við á,
- hvenær og með hvaða hætti nemendur fá endurgjöf,
- og að nemendur bera sjálfir ábyrgð á gæðum, nákvæmni og heilindum verkefna sinna.
5. Umfang, snið og skil
Settu praktískar kröfur fram á skýran hátt.
Taktu fram:
- umfang verkefnis, lengd eða tímalengd,
- áætlað vinnuframlag nemenda, sérstaklega ef verkefnið er umfangsmikið eða unnið í áföngum,
- skilasnið, til dæmis PDF, myndband, glærur, ferilmappa (portfolio), kóði eða annað skráarsnið,
- hvaða verkfæri, kerfi eða hugbúnað nemendur eiga að nota, ef við á,
- hvort valkostir eru í boði ef nemandi getur ekki eða vill ekki nota tiltekið verkfæri,
- skilafrest, með dagsetningu og tíma,
- hvar og hvernig nemendur eiga að skila,
- takmarkanir á skráarstærð, fjölda heimilda, viðaukum eða fylgigögnum, ef við á,
- og tengla á leiðbeiningar um skil í Canvas, ef það gagnast nemendum.
6. Samvinna og leyfilegur stuðningur
Skýrðu hvers konar aðstoð er leyfileg.
Taktu fram:
- hvort verkefnið er einstaklings- eða hópverkefni,
- hvaða samvinna milli nemenda er leyfileg,
- hvort jafningjamat eða jafningjaendurgjöf er leyfileg eða hluti af verkefninu,
- hvaða stuðning nemendur mega fá frá kennurum, aðstoðarkennurum, ritveri eða öðrum,
- hvernig framlag hvers nemanda í hópverkefnum verður skráð eða metið,
- og hvar nemendur geta spurt spurninga og hvernig svörum eða skýringum verður miðlað til hópsins.
Gagnleg spurning:
Hvaða aðstoð styður nám nemenda og hvaða aðstoð grefur undan tilgangi námsmatsins?
7. Notkun gervigreindar
Taktu skýrt fram hvort notkun gervigreindar sé leyfð, takmörkuð, áskilin eða óheimil í verkefninu.
Tilgreindu:
- hvaða notkun er leyfð, til dæmis við hugmyndavinnu, skipulag, málfarsyfirferð, endurgjöf eða mótun mótraka;
- hvaða notkun er óleyfileg, til dæmis að skila efni útbúnu af gervigreind sem eigin verki eða láta gervigreind vinna megingreiningu verkefnis;
- hvort og hvernig nemendur eiga að lýsa eða skrá notkun gervigreindar;
- og að nemendur beri ábyrgð á að yfirfara nákvæmni, heimildir, skekkju og viðeigandi notkun.
Minntu nemendur einnig á að setja ekki persónuupplýsingar, trúnaðargögn, óbirt rannsóknargögn, viðtalsgögn eða texta annarra inn í gervigreindartól nema það hafi verið sérstaklega heimilað.
Dæmi um yfirlýsingu vegna notkunar gervigreindar
Ég notaði / notaði ekki gervigreindartól í þessu verkefni. Ég notaði þau í eftirfarandi tilgangi: […]. Ég yfirfór og endurskoðaði úttakið með eftirfarandi hætti: […]. Ég ber ábyrgð á lokaskilum mínum.
8. Akademísk heilindi, aðgengi og reglur námskeiðs
Hafðu viðeigandi reglur og væntingar auðfundnar.
Taktu fram eða vísaðu með tengli í upplýsingar um:
- heimildanotkun og tilvísanir,
- ritskimunarkerfi eins og Turnitin, ef þau eru notuð,
- hvernig samsvörunarskýrslur eða aðrar upplýsingar frá Turnitin verða túlkaðar,
- ferli vegna gruns um brot á akademískum heilindum,
- reglur um sein skil, fresti og endurskil,
- og vegna aðgengis skaltu nota skýrar fyrirsagnir, stuttar málsgreinar, lýsandi tengla og hnitmiðað mál.
Úttak úr hugbúnaði, þar á meðal ritskimunarkerfi eða greiningartólum með gervigreind, ætti ekki að teljast sjálfkrafa sönnun um brot. Slík mál þarf að skoða í samræmi við réttláta málsmeðferð innan skólans.
Lokayfirferð áður en verkefnislýsing er birt
Áður en verkefnislýsing er birt nemendum er gagnlegt að spyrja:
- Er tilgangur verkefnisins og tenging þess við hæfniviðmið skýr?
- Er ljóst hvað nemendur eiga að gera og hverju þeir eiga að skila?
- Er skýrt hvað er krafa, hvað er valkvætt og hvað er ráðlegging?
- Eru matsviðmið skýr og sýnileg?
- Er umfang og áætlað vinnuframlag í samræmi við vægi verkefnisins?
- Er ljóst hvað nemendur vinna sjálfir og hvers konar samvinna, aðstoð, verkfæri og notkun gervigreindar er leyfileg?
- Hefur verið hugað að persónuvernd og gagnaöryggi?
- Eru skilafrestur, skilasnið og skilaleið auðfundin?
- Er textinn aðgengilegur og auðlesinn?
Góð verkefnislýsing segir nemendum ekki aðeins hverju þeir eiga að skila, heldur einnig hvers vegna verkefnið skiptir máli, hvernig þeir geta unnið verkefnið á ábyrgan hátt og hvernig þeir geta sýnt eigið nám.