Samræmi á milli námskeiðsvefja
Nemendur eru oft skráðir í mörg námskeið á sama tíma. Þeir þurfa að geta fundið fljótt hvar kennsluáætlun er, hvað á að gera í vikunni, hvenær á að skila verkefnum, hvernig námsmati er háttað og hvar þeir fá endurgjöf.
Í könnunum meðal nemenda hefur ítrekað komið fram að námskeiðsvefir séu mjög ólíkir og stundum illa skipulagðir. Nemendur upplifa þá að þeir þurfi að læra á Canvas upp á nýtt í hverju námskeiði, í stað þess að geta einbeitt sér að náminu sjálfu.
Samræmi þýðir þó ekki að allir námskeiðsvefir eigi að vera eins. Námskeið eru ólík og kennarar þurfa svigrúm til að setja efni, verkefni og samskipti fram á þann hátt sem hentar námskeiðinu. Markmiðið er frekar að kennarar innan námsleiðar eða deildar sammælist um nokkur lykilatriði sem auðvelda nemendum að rata, skipuleggja sig og átta sig á væntingum í námskeiðinu. Í samkomulagi Kennslumiðstöðvar um samhæfingu námskeiðsvefja er einmitt lagt til að kennarar velji nokkra þætti til að samræma, frekar en að reyna að staðla alla námskeiðsvefi.
Vel skipulagður námskeiðsvefur getur jafnframt sparað kennurum tíma. Þegar nemendur finna upplýsingar á fyrirsjáanlegum stöðum fækkar fyrirspurnum um skipulag, skiladaga, verkefni og vægi námsmats.
Hvað er gagnlegt að samræma?
Kennarar þurfa ekki að sammælast um allt í einu. Oft er best að byrja á þeim atriðum sem hafa mest áhrif á yfirsýn nemenda og bæta síðan við eftir þörfum.
Þessi atriði skipta mestu máli fyrir nemendur og ættu að vera efst á lista þegar rætt er um samræmi á milli námskeiðsvefja.
- Birting námskeiðsvefs
Hvenær á námskeiðsvefur að vera birtur og hvaða upplýsingar eiga að vera tilbúnar við upphaf kennslu? - Kennsluáætlun á sama stað
Gott er að kennsluáætlun sé alltaf undir kennsluáætlun í valmynd námskeiðs og að nemendur þurfi ekki að leita að henni á mismunandi stöðum. - Sambærileg uppbygging kennsluáætlunar
Kennarar geta sammælst um helstu kafla, heiti þeirra og röð, til dæmis upplýsingar um námsmat, skilareglur, mætingu, samskipti, notkun gervigreindar, Turnitin og stuðningsúrræði. - Markviss notkun námskeiðsdagatals
Skiladagar, prófdagar, fjarfundir, kennslustundir og aðrir mikilvægir viðburðir ættu að birtast í dagatali námskeiðs. Ef dagatalið er aðeins notað í sumum námskeiðum nýtist það nemendum síður. - Skýr uppbygging eininga eða vikna
Kennarar geta sammælst um hvort einingar standi fyrir vikur, þemu eða efnishluta og hvort uppbygging innan þeirra sé sambærileg, til dæmis: yfirlit, lesefni, upptökur, umræður og verkefni. - Sambærileg valmynd námskeiðs
Valmyndin ætti að sýna þá tengla sem nemendur þurfa að nota og fela það sem ekki er notað. Ef valmyndir eru sambærilegar á milli námskeiða læra nemendur fljótt hvar þeir finna helstu atriði. - Kynning á námskeiðsvef í upphafi misseris
Gott er að kennari sýni nemendum hvar helstu upplýsingar eru, hvernig vefurinn er skipulagður og hvernig Canvas verður notað í námskeiðinu.
Þessi atriði hafa bein áhrif á það hvort nemendur skilja hvað á að gera, hvenær og hvernig það hefur áhrif á lokaeinkunn.
- Öll helstu verkefni og próf sýnileg í upphafi námskeiðs
Verkefni, umræður, próf og önnur skil sem gilda til einkunnar geta verið stofnuð og birt frá upphafi, jafnvel þótt nánari lýsing eða aðgangur opnist síðar. - Vægi verkefna og prófa uppsett í Canvas
Þegar vægi námsmats er sett upp í Canvas sjá nemendur betur hvernig einstök verkefni og próf tengjast lokaeinkunn. - Sambærileg uppbygging verkefnalýsinga
Kennarar geta notað sameiginlegt sniðmát þar sem fram kemur til dæmis: hvað á að gera, skilafrestur, skilaleið, vægi, hæfniviðmið, matsviðmið og hvaða gögn á að nota. - Skýrar upplýsingar um reglur tengdar skilum
Gott er að samræma hvernig upplýsingar um sein skil, endurtekin skil, undanþágur eða aðrar reglur eru settar fram. - Samræmd framsetning endurgjafar
Kennarar geta sammælst um að nota SpeedGrader fyrir endurgjöf, að gefa endurgjöf innan ákveðins tíma þegar það er mögulegt og að hafa endurgjöfina þannig að hún nýtist nemendum áfram í náminu. - Notkun matskvarða eða matsviðmiða
Ef matskvarðar eru notaðir getur verið gagnlegt að hafa sambærilega framsetningu, svo nemendur átti sig betur á væntingum og mati.
Hér er gott að samræma hvar nemendur finna námsefni, fundi og samskipti.
- Hvar upptökur eru birtar
Kennarar geta sammælst um hvort upptökur séu birtar í Panopto, Studio, á síðum í einingum eða á öðrum föstum stað. - Hvernig fjarfundir eru settir fram
Gott er að fjarfundir birtist bæði í viðeigandi einingu og í námskeiðsdagatali, þannig að nemendur sjái þá í samhengi við annað efni vikunnar. Einnig hvort kennarar noti almennt Teams eða Zoom. - Notkun tilkynninga
Kennarar geta sammælst um hvernig tilkynningar eru notaðar, til dæmis hvort mikilvægar tilkynningar birtist efst á heimasíðu námskeiðs. - Samskipti nemenda
Ef nemendur eiga að nota umræður, hópa eða skilaboðakerfi Canvas er gagnlegt að kynna það með sambærilegum hætti í námskeiðum námsleiðar. - Aðgengi í snjalltækjum
Þar sem margir nemendur nota Canvas í síma er gagnlegt að kennarar skoði hvernig námskeiðsvefurinn birtist í Canvas appinu og forðist uppsetningu sem virkar illa á litlum skjá.
Þessi atriði geta sparað tíma og stutt við samræmi án þess að takmarka faglegt sjálfstæði kennara.
- Sniðmát fyrir kennsluáætlun
Sameiginlegt sniðmát getur hjálpað kennurum að muna eftir mikilvægum upplýsingum og gert kennsluáætlanir sambærilegri. - Sniðmát fyrir verkefnalýsingar
Verkefnasniðmát getur tryggt að nemendur fái sömu grunnupplýsingar í öllum verkefnum, þótt verkefnin sjálf séu ólík. - Sniðmát fyrir vikuyfirlit eða efnissíður
Ef námskeið eru skipulögð eftir vikum getur einfalt vikuyfirlit hjálpað nemendum að sjá hvað á að lesa, horfa á, mæta í og skila. - Sameiginleg könnun meðal nemenda
Kennarar geta lagt stutta könnun fyrir um miðbik misseris til að kanna hvort nemendur finni upplýsingar, skilji skipulagið og geti fylgst með námsmati og skiladögum.
Þessi atriði geta verið mikilvæg, en þau tengjast oft ólíkri kennsluaðferð, námsmati eða faglegum áherslum kennara. Þau henta því betur þegar grunnsamræmi er komið á.
- Heimasíða námskeiðs
Kennarar geta sammælst um hvort einingar/vikur séu heimasíða námskeiðs, hvort notuð sé sérstök lendingarsíða eða hvort kennsluáætlun sé sýnd fyrst í upphafi misseris. - Nákvæm röð efnis innan eininga
Það getur verið gagnlegt að hafa sambærilega röð, en kennarar þurfa stundum ólíka uppbyggingu eftir eðli námskeiðs. - Hvaða prófakerfi er notað
Í sumum tilvikum getur verið gagnlegt að samræma notkun Inspera eða Canvas prófa, en það fer eftir vægi prófa, gerð námsmats og verklagi deildar. - Helstu stillingar prófa
Kennarar geta rætt hvort samræma eigi atriði eins og birtingu prófúrlausna, tímamörk, fjölda tilrauna eða hvort nemendur megi fara fram og til baka í prófi. - Notkun Turnitin
Gott getur verið að samræma hvort Turnitin sé notað í öllum skriflegum verkefnum, aðeins í stærri verkefnum eða ekki, og hvaða upplýsingar nemendur fá um notkun þess. - Hvaða kerfi er notað fyrir upptökur og fjarfundi
Sum námskeið þurfa Panopto, önnur Studio, Teams eða Zoom. Mikilvægast er að nemendur fái skýrar upplýsingar um hvar efnið er og hvernig það er notað. - Stillingar námskeiðsvefs
Til dæmis tungumál námskeiðs, hvort nýjustu tilkynningar birtast á heimasíðu, hvort nemendur mega stofna hópa eða umræður, og hvaða valkostir þátta eru virkjaðir. - Aðgangsstýring í einingum
Forkröfur, kröfur um að merkja við lokið og stýrður aðgangur að efni geta verið gagnleg verkfæri, en eiga ekki endilega við í öllum námskeiðum.
Byrjið á fáum atriðum
Samræming þarf ekki að vera stórt verkefni. Kennarar geta byrjað á nokkrum atriðum sem skipta nemendur mestu máli, til dæmis kennsluáætlun, dagatali, einingum og leiðarstýringu/valmynd. Þegar þau atriði eru orðin skýr og sambærileg má bæta við fleiri þáttum eftir þörfum.
Markmiðið er einfalt: að nemendur geti gengið að lykilupplýsingum vísum og notað orkuna í námið, ekki í að leita að því hvernig námskeiðsvefurinn virkar.