Grunnatriði Canvas
Gerðu þér sporin áfram léttari með því að kunna grunnatriðin
Grunnatriði Canvas fjalla um þau verkfæri sem allir nota hvað oftast: Skjáborðið, ritilinn, stillingar notanda og tilkynninga, skilaboð, dagatalið og Canvas-appið. Með því að kunna skil á þeim verður auðveldara að finna upplýsingar í námskeiðum, eiga skilvirk samskipti og halda utan um verkefni og tímasetningar, hvort sem þú ert í námi, kennir eða aðstoðar aðra notendur.
Þessi grunnatriði eru í sumum tilvikum einnig grunnur að því að nota önnur verkfæri í námskeiði. Ritillinn er t.d. notaður þegar tilkynningar eru búnar til, við að hanna síður, setja upp tengla í efni námskeiðs, taka upp stutt myndskeið, setja upp fjarfund og deila myndböndum.
Ritillinn
Ritillinn í Canvas kemur víða fyrir og er mikilvægt verkfæri fyrir bæði nemendur og kennara. Hann er meðal annars notaður á síðum, í verkefnum, umræðum, tilkynningum og prófum. Nemendur nota ritilinn t.d. þegar þeir taka þátt í umræðum eða skila verkefnum beint í Canvas, en kennarar við að útbúa og miðla efni námskeiða.
Í ritlinum er hægt að móta texta, setja inn myndir, skrár og tengla og taka upp stutt hljóð- eða myndskeið. Einnig er hægt að vinna með ýmiss konar miðlun og upptökur, svo sem Studio og Panopto, eftir því hvaða aðgang og verkfæri notandinn hefur.
Mikilvægt er að efni sem kennarar setja upp í ritlinum sé unnið með stafrænt aðgengi í huga þannig að allir nemendur hafi jafnan aðgang að því. Sjá nánar:
Stillingar notanda
Í þínum persónulegu stillingum er m.a. hægt að:
- velja hvaða persónufornafn þú kýst að notað sé um þig.
- stilla á hvaða tungumáli Canvas birtist þér. Námskeið sem hafa sjálfvalda tungumálastillingu birtast á tungumáli notandans en ef námskeið hefur verið stillt á tiltekið tungumál birtist það öllum á því tungumáli.
- bæta við auka netfangi.
Ýmsar upplýsingar varðandi notendur eru sóttar úr Uglu og er eingöngu hægt að uppfæra þar. Þetta á t.d. við mynd af notanda og lykilorð.
Stillingar tilkynninga
Canvas sendir notandanum sjálfvirkar tilkynningar við ýmis tækifæri. Í stillingum fyrir tilkynningar er hægt að velja hvaða tilkynningar Canvas sendir og hversu oft t.d. strax, daglega, vikulega eða alls ekki. Þar getur kennari t.d. valið að fá tilkynningu í tölvupósti í hvert skipti sem nemandi skilar verkefni eða skráir innlegg í umræðu að vikulega samantekt.
Farið er í reikning efst í Canvas valmyndinni og í tilkynningar. Hægt er að velja stillingar almennt fyrir öll námskeiðin sín með því að velja reikningur í fellilista efst á stillingarsíðunni en með því að velja tiltekið námskeið gilda stillingarnar einungis fyrir það.
Skilaboð
Hægt er að nota skilaboðatólið til að eiga samskipti við þátttakendur í námskeiði. Með skilaboðum er hægt að hafa samskipti við námskeið, einstaka nemendur eða hóp nemenda. Kennarar óska oft eftir því að nemendur noti skilaboð í Canvas til að hafa samband í stað hefðbundins tölvupósts.
Það fer eftir stillingum notanda á tilkynningum hvort tölvupóstar berist frá skilaboðatólinu.
Dagatalið
Hlekkur á dagatalið er í Canvas valmyndinni (bláa borðanum vinstra megin). Þar getur notandinn skráð viðburði og skoðað námskeiðsdagatöl allra sinna námskeiða á einum stað.
Það getur gefið nemendum yfirsýn yfir álagstíma og auðveldað skipulag á náminu fram í tímann. Gott er þó að hafa í huga að ekki er sjálfgefið að allir kennarar noti námskeiðsdagatalið.
Canvas appið
Með Canvas appinu hefur notandinn skjótan aðgang að námskeiði og getur t.d. skoðað verkefnaskil eða svarað umræðu.
Í notendakönnun á meðal nemenda (2021) kom fram að nemendur nota mikið símann fyrir Canvas. Námskeiðsvefur birtist ekki eins í tölvu og snjallsíma. Mikilvægt er því að skoða námskeiðsvefinn í appinu um leið og hann er hannaður. Sérhönnuð heimasíða námskeiðs birtist t.d. ekki í appinu.
Ítarlegri leiðbeiningar á vef Canvas: